El circuitu d’artes visuales ‘Asturies Cultura en Rede’ entama  la xira mañana cola apertura d’esposiciones en Corvera, Castrillón y El Franco

31/03/2022.- La conseyería de Cultura, Política Llingüística y Turismu va averar al públicu les propuestes d’una docena d’artistes visuales asturianos al traviés del programa Asturies Cultura en Rede. La programación nueva del circuitu d’artes visuales va arrincar mañana vienres cola apertura d’esposiciones en Castrillón, Corvera y El Franco.

Trilogía Poética: Al horru, d’Ediciones Pata Negra en Corvera; Gérmenes de Ramón Isidoro en Castrillón y No tengo por qué subir al árbol de Dos Ajolotes Espacio de Arte n’El Franco son les trés propuestes qu’abren el cartel del circuitu d’artes visuales d’Asturies, Cultura en Rede pa los meses vinientes. La Conseyería de Cultura, Política Llingüística y Turismu invirtió 100.000 euros na producción de los proyectos espositivos que van poder vese estos meses per tola xeografía asturiana.

La convocatoria pa presentar proyectos nuevos al circuitu d’artes visuales d’Asturies, Cultura en Rede queda abierta hasta’l 22 de mayu, a les 14:00 hores. Nesti circuitu los proyectos van desenvolvese en dos fases: el diseñu, desenvolvimientu y producción va llevase a cabu primero del 31 d’avientu d’anguaño y la exhibición, a partir del 1 de xineru del 2023, con una duración mínima d’un mes por sede o conceyu. Los costos de la producción de los 12 proyectos escoyíos na última convocatoria xuben a 100.000 euros.

El vienres 1 d’abril van inaugurase les esposiciones. El públicu va poder averase hasta’l 29 d’abril en La Lechera de Cancienes en Corvera a la Trilogía Poética: Al horru d’Ediciones Pata Negra, esposición onde participen 60 poetes y otros tantos artistes plásticos pa rindir homenaxe a esti elementu mueble tan representativu y peculiar de l’arquitectura mueble asturiana y española.

Nel Centru Cultural Valey en Castrillón los visitantes van poder ver en Gérmenes una muestra qu’axunta trabayos del artista multidisciplinar Ramón Isidoro hasta’l 28 de mayu; y na sala d’esposiciones As Quintas, No tengo por qué subir al árbol de Dos Ajolotes Espacio de Arte hasta’l 30 de abril, un proyectu de Cécile Brillet que resalta la diversidá y circunstancies de les muyeres n’Asturies, tanto nes zones urbanes como rurales.

Nel marcu del circuitu d’artes visuales tamién va exhibise d’equí a poco De la escultura a la gráfica. Mundo Escultura contemporánea en Asturias  d’Ediciones Pata Negra del 4 al 28 d’abril en Mieres; Mundo-imagen de Juan Falcón del 4 d’abril al 14 de mayu en Xixón; y Disfruten un año nuevo sanos y seguros de Juanjo Palacios del 7 d’abril al 15 de mayu n’Avilés.

Amás, nos meses vinientes el Proyecto RCCA (Reinterpretación Contemporánea de la Cultura Asturiana) de Ricardo Villoria va llegar a A Veiga y Llanes; Trilogía Poética: Al horru, a Cangas del Narcea; La línea, la evolución, la expansión de Roberto Lorenzo, a Mieres; Xente de Pablo Casanueva, a Xixón y Avilés; Parece que va a llover de Guillermina Caicoya, con un proyecto de Natalia Pastor, a Castrillón; y Un ensayo para la salvación de lo bello y lo vinculante de Cristina Ferrández, a Xixón.

Asturies, Cultura en Rede ye un proyectu de la Conseyería de Cultura, Política Llingüística y Turismu, fechu en collaboración colos conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies, onde tamién s’incluyen circuitos temáticos de música, artes escéniques, Xacobéu, cultura tradicional, lliteratura, Autores nel Camín y Camín de los Santuarios – Cuadonga 2022.